VUNZEMALEC I ŽIVAD

Svemirski brod s Mevazutre zabio se u gnoj iza Ivekove staje. Ivek je s traktorom izvukao raketu iz gnojnice i svemircu nadjenuo ime – Darko. Dar s neba. Izvanzemaljskog tinejdžera-buntovnika okupao je mlazom vode iz sapnice kojom je inače prao staje i svinjce. Darko se ubrzo oporavio od pada i svladao gravitaciju i kajkavicu, globalni zemaljski jezik.

D: Kaj će ti vse to pisano perje na dvorišču?

I: To je živad. Vdomačene tice.

D: Larmaju, naganjaju se po dvoru i delaju blato. Stalno nekaj žereju.

I: To je moja rezerva rane.

D: Kaj će ti rezerva rane, si hoarder?

I: Ak Zemlu napadneju vunzemalci, bum preživel vuz svoju živad. Ne bu gladi.

D: Dober je strav… Kaj je ono veliko belo? Labudi?

I: Guske. Tu su pri nam sedam jezera let.

D: Se sečaš gda su se doteple?

I: Naj noriti. Onda race. One su menše od gusek.

D: Vam je sfalelo materijala za race, imaju krajše noge i vrat.

I: Dosti. One žive sekud izim na Antarktike.

D: Tam se zoveju pingivini?

I: Huncut jen vunzemalski!

D: Nesu vse race jenake, kak to?

I: One tenke i visoke kaj se čine da stalno drče su pužolovke, z Indije.

D: One male čuče, kaj je to? Su to novi dinosavuri, ih je inflacija strefila, ili kaj?

I: To je rvacka kokica. Čučuriček, cvergl, turčinec, Đurek i Katica, kredlice…

D: A jel vsaka ima svoju kumu, nemate kaj delati nek im zmišlati ime?

I: Vsaki kraj im da svoje ime. Negda se ni rajzalo, ni bilo telefona, interneta, televizije. Ni se znalo kak neko zove kteru pasminu kokoši.

D: A ovi tiči-pučpuriči na orehu?

I: To su purice i purani.

D: Ak si kokošima naredil kokošinec, racam racinak, ne znaš kak bi zval pureču hižu pak ju nesi ni naredil, ili kaj?

I: Po zime spiju v kokošincu, a po letu na drevu.

D: Pri susedu Marku sem videl nekakve tičeke v gajbe. Kaj če mu to?

I: To su japanske prepelice.

D: Sirotice, su daleč od doma. Tak mi je i samom… A, jel ti voliš tu svoju živad?

I: Volim.

D: A jel mene voliš?

I: Kak to misliš, jel tebe volim?

D: Čera sem gledel kak je jena čuča skončala na penu.

I: Dober je strav, lepi moj, dober je strav.

—–

Manje poznate riječi: pisano – šareno; larmati – praviti buku; žerati – jesti; vrči se – pretvoriti se; skončati – završiti.

Autorica; Đurđa Vukelić Rožić