Svemirski brod s Mevazutre zabio se u gnoj iza Ivekove staje. Ivek je traktorom izvukao raketu iz gnojnice i svemircu nadjenuo ime – Darko. Dar s neba. Izvanzemaljskog tinejdžera buntovnika okupao je mlazom vode iz sapnice kojom je inače prao staje i svinjce. Darko se ubrzo oporavio od pada i svladao gravitaciju i kajkavicu, globalni zemaljski jezik.
D: Meni se čini da ti voliš te toplice v sudoperu. A nečeš zmenu v gnojnice sedeti i namakati se kak se spada.
I: Kaj bi bil v toplicam, posude perem.
D: A zakaj?
I: Kak misliš, zakaj? Posude se mora oprati, obrisati i na mesto v kredenca deti. Gda je trebaš onda su lepe čiste.
D: Gledel sem kak Campek i micek obližeju svoje zdele. Same vi ljudeki ste zavostali.
I: Da sem štel laprdalo v hiže bi se drugi put ženil.
D: Kaj je to laprdalo?
I: Oseba kaj stalno nekaj žvagla.
D: Kaj je to – žvagla?
I: Žvaglati znači pripovedati, isto kaj i brblati, blebetati, bučiti, fuflati, jamrati, klafrati, klepetati, larmati, mumlati, prodekuvati, šlabekati, šprehati, žlabrati …
D: Zgledi da znaš abecedu, nemrem veruvati kak si vučeni. Ak si odajuča enciklopedija kak to da si sirotinja. Ni vodovoda nemaš v hiže. Šekret je vani za štaglom. Te muve ne napadaju kroz ventilaciju zmed deski? Moraš se sleči…
I: Odi se močiti v gnojčinu, oču svoj mir. Da bi bil spameten ne moraš biti bogatun.
D: Ja sem mislel da su bogatuni spametni, natrajbaju peneze.
I: Misli si kaj očeš.
D: Gleč, zememo zmazane posude i sednemo si v gnojčinu i bumo lonce i ranjgle tam skup ribali. I bumo se lepo spominali.
I: To ti ne bu prešlo. Ali, moreš zasukati rukave i zutra oprati posude tu v sudoperu.
D: Veselim se, donesem kantu gnojnice…
I: Ni mislit, bedak jen vesmirski! Bum te z ovu tavicu … Ti i tvoja gnojčina.
D: Očeš reči, tvoja gnojčina? Ti si kaj raca, voliš vodu. Pereš posude, pereš veš, ribaš pod. Čera si jobluke pral. Kaj ti to ne dojadi?
I: To je lehkeše nek imati doma ženu gazdaricu. Cele dane čisti i pere, kuva. Moram ju obleči, raniti, i slušati cele dane. Rodi decu, novci nigda dosti, problemima nigda kraja. Daj ovo, daj ono…
D: I moraš spelavati oj, la, la celu noč. Bormeš, gadno. Koga si se vraga onda ženil?
I: Kam vsi tam i mali Mujica.
D: Ko je sad pak to? Si i nega ženil.
I: Si ponorel. To se tak veli.
D: Kaj se tak veli?
I: Kam svi tam i mali Mujica. To je gda si mlad i bedast i delaš sve isto kaj i drugi ljudi.
D: Tu nekaj ne štima. Ja to niš ne razmem.
I: To ni moj problem. Naredi si koktela z gnojnicu, morti ti se presvetli.
D: Ja mislim da tebe fali tvoja gazdarica. Zato se zmenum stalno svadiš.
I: Ti si zbilam vsakom loncu poklopec.
D: Kaj sad to znači?
I: A ništ. Imaj se zmirom i odi se pacati za štalum. Bez lonci, ranjglic i poklopcev!
– KRAJ –
Manje poznate riječi: Laprdalo – pričalica; žvaglati – brbljati; pacati – namakati.
Autorica: Đurđa Vukelić Rožić
