VUNZEMALEC I NAPOJ

Svemirski brod s Mevazutre zabio se u gnoj iza Ivekove staje. Ivek je traktorom izvukao raketu iz gnojnice i svemircu nadjenuo ime – Darko. Dar s neba. Izvanzemaljskog tinejdžera buntovnika okupao je mlazom vode iz sapnice kojom je inače prao staje i svinjce. Darko se ubrzo oporavio od pada i svladao gravitaciju i kajkavicu, globalni zemaljski jezik.

I: Darko, kaj za Boga miloga delaš?

D: Jem.

I: Dobar tek! Am si ponorel, to ni za jesti!

D: Zakaj ne? Baš mi je fino. Kak se to zove?

I: Napoj.

D: A zakaj je v kante na podu?

I: Zato kaj je to napoj.

D: Mi daš recepta? Gda se vrnem na Mevazutru, bum glavni chef.

I: Ni mislit.

D: Znači, ti si kreativen kuvar i recept je tvoja tajna?

I: Moglo bi se reči. Izim tega, morti je to čemerno i okuženo za vas mevazutrance.

D: Ti bokca! Pem spat v gnojčinu za vsaki slučaj, me zleči. A zakaj se napoj zove napoj?

I: Po napojišču. Zliješ napoj v kopanju, ili napojišče, i onda lačne svine vse pocmrkaju.

D: Čuj, ak me pamet dobro služi, snočka v birtije ostavil si one dekle napojnicu.

I: Jes, te dekla ima malu plaču, sirota, a nadela se, pijance trpi vsaki dan.

D: Zakaj se napojnica zove napojnica.

I: Tak se to zove. Ostaviš nekaj malo penezi kelnerice kaj te je podvorila.

D: Zakaj?

I: Kaj pak, zakaj kaj?

D: Zakaj se reč napojnica dela od napoja?

I: Ostatek rane se zove napoj, na kajkavščine. Napojnica je reč hrvackoga jezika.

D: A kak se napojnica veli na kajkavskomu?

I: Tringeld.

D: Čudna reč, da imam jezik bi se potrgal od ne.

I: Z nemačkoga prevuzeto. Trinkgeld. Kak i cug, špajza, šos, šalter, štokrl, zrihtati …

D: Bokci bistrički, fale vam reči …

I: Ja znam kaj meni fali, mira, mojega mira v moje hiže.

D: V kaj god pehnem, ni dobre, ni dobre.

I: Naj mi reči. Misliš da bi te kakovi bogatun v Lihtenštajnu zvlačil z gnojnice?

D: Kaj je to Lihtenštajn?

I: Orsag, med najbogatešima na svetu. I ni je briga za vunzemalce.

D: Zato sem je ja k tebi prišmajhlal. Znal sem da je bokčija dobrega srčeka.

I: Je, baš sem se vusrečil ztebu.

D: Reči da nesi. Gda popravimo motor moga raketlina i bu vozil na gnojščinu, peš zdemnu na Mevazutru zabadaf. Celi vesmir bu naš!

I: Ni mislit! Kravice buju žeđne, svine glane, kokoši polovi lisica, kaj če mene vesmir?

D: Dobro nehotene zlata vredi.

– KRAJ –

Manje poznate riječi: Napoj – ostaci hrane, dodatak prehrani svinja; napojišče – pojilo; kopanja – korito za vodu i/ili hranu; čemerno, okuženo – otrovno; lačen – gladan; cmrkati – srkati; nehotene – izgovor.

Autorica: Đurđa Vukelić Rožić

Ilustracija. Pixabay